Каме латра. Салими Аюбзод

Нахуст одам дар айёми навхатӣ аз рӯи ҳавас ва дар ташнагии шӯҳрат даст ба нависандагӣ мезанад. Фарри қудсият ва обрӯи баланди устодони пуровозаи сухан ӯро мафтун мекунанд ва ҳамчун як ҷавони пур аз нирӯ ва ғайрат мехоҳад, рӯзе ба зинаи фатҳкардаи онҳо қадам гузорад, дар пешгоҳи намоёни саҳна ва ё минбару маҳфилҳои ашрофонаи онҳо падид ояд ва ҳатто агар тавонад, аз онҳо ҳам баландтар парвоз кунад. Он гуна машҳур шавад, ки дар ҳама ҷо ӯро бишносанд ва эҳтиром кунанд. Ҳанӯз маълум нест, вай аз ин шӯҳрат чӣ дастбурд мехоҳад...