Як коса оби ҷонпарвар (маҷмуаи ҳикояҳо)

Китоби ҳар адиб, кам ё беш, шабоҳате ба нигорандаи он дорад. Аз ин ҷост, ки дар як ҳикмати машҳури тоҷикӣ омадааст:

Косаи чинӣ, ки садо мекунад,
Худ сифати хеш адо мекунад.

Ман, вақте, ки ба мутолиаи дастнависи маҷмӯаи ҳикоёт ва ёдгунаҳои устод Нур Табаров «Як коса оби ҷонпарвар» пардохтам, дар ҳар сатреву ҳар барге аз ин навиштор симои дурахшони муаллиф: ботини нуронӣ, тинати пок, нигоҳи хушбин ва ҷаҳонбинии пурвусъату рангини эшон ба мушоҳида расид.