Лолаи сиёҳ (маҷмӯаи шеърҳо). Бозор Собир

Умре ҳама машқи шеър кардам охир,
Аз модари худ касе наомад шоир.
Ин дафтари ман сиёҳмашқ аст агар,
Гулдастаи лолаи сиёҳаш бинигар.

Яке аз устодони шеъри муосири тоҷик, барандаи Ҷоизаи давлатии Тоҷикистон ба номи Абӯабдуллоҳи Рӯдакӣ Бозор Собир аз ғурбати бистсола бо маҷмӯаи «Лолаи сиёҳ» баргашт. Ва он, чун дигар маҷӯаҳои шеъри ӯ, аз маъниҳои тоза, тасвирҳои дилнишин, образҳои наву зебо ва тобишҳои муассиру ғайриодатии забону баён фароҳам омада, хонандаи хушзавқро ба уфуқҳои хаёлангези сухани шоирона мебарад.